呢幾日天朗氣清,阿史自然同好多香港人一樣都走去行山。早前就去咗港島南區嘅龍脊行咗轉,响山上望落石澳風景真係幾正。不過話時話,石澳有個好大嘅哥爾夫球場,點解會响度嘅呢?

呢個位於石澳海濱嘅哥爾夫球場,係屬於石澳高爾夫球會,球場內最早建築有成百年歷史,唔駛講都知呢個係以前英國有錢人同達官貴人嘅特權玩意。因為响昔日英國管治香港時期,啲政府同啲商人就霸咗唔少南區風景最靚起別墅,石澳就係其中一個地方。而據網上資料顯示,呢個哥爾夫球場係香港最神秘嘅私人俱樂部,因為球場只招待會員,而要成為會員就必須係石澳別墅業主,仲要獲得其他石澳別墅業主推薦。石澳大概別墅業主好似都係得幾十個,個個非富則貴响城中有頭有面,所以真係特權得交關。