有「巾幗宰相」之稱嘅歷史人物上官婉兒相信唔少史友們都聽過佢大名，而關於佢嘅墓葬其實早年就已經經過考古發掘而搵咗出嚟，咁到底當中嘅情況係點，又有啲咩文物呢？咁就要去近日建成、全國首座考古博物館度睇一睇喇！

陝西考古博物館近日建成並且喺今日試運開放，雖然係叫做考古博物館，但其實內部都有好多重要嘅歷史文物，例如就有唐昭容上官氏墓以及首次展出嘅上官婉兒墓誌。

上官婉兒係武則天時期具「巾幗宰相」頭銜嘅內舍人，當初考古團隊發現佢墓室嘅時候，其實墓室嘅磚券及天井已遭嚴重破壞。同盜墓以及自然崩壞唔同，呢個墓穴嘅破壞其實係因為唐玄宗認定上官婉兒係太平公主一黨，所以先進行「官方毀墓」。而喺呢個墓室當中，墓誌內容補充咗上官婉兒喺唐隆政變被殺後，由太平公主禮葬嘅相關訊息，亦都清楚記載其身份，真係相當難得嘅發現！

原圖嚟自網絡