今日係五四運動103周年紀念,咁重要嘅日子自然要每年講一次。可能史友們睇同五四運動相關歷史時,都會見到以「勝利」嚟形容呢次愛國運動。咁五四運動帶嚟咗乜嘢勝利呢?

最直接理解就係一次外交上嘅勝利。因為五四運動嘅導火線就係巴黎和會上中國外交失敗,德國強佔山東嘅利益俾晒日本,激起全國民憤,最終北洋政府迫於壓力,罷免曹汝霖、章宗祥、陸宗輿幾個親日派官員,巴黎和會嘅中國代表亦拒絕响和約上簽字,呢個就係後世理解同認同嘅外交勝利。

阿史近年睇到一個觀點,其實都幾值得史友們深思,就係話呢次運動最重要嘅,就係對帝國主義以及封建主義嘅徹底反抗。點解咁講呢?就係辛亥革命雖然推翻滿清政權,但就無徹底同帝國主義以及封建主義割裂。但响五四運動發生後,中國人民都認同「反帝反封建」呢條道路,可以視為另類嘅「勝利」。對於呢個觀點唔知史友點睇呢?

原圖嚟自網絡