之前都介紹過東晉開國皇帝司馬睿一啲事蹟，阿史讀中一個陣中史老師讀到東晉時就讀咗句當時係「王與馬共天下」，咁呢句話反映咗乜嘢歷史故事呢？

「王與馬」，其實就係東晉初期兩個勢力最強大嘅家族，馬即司馬，乃帝皇之家，至於王，就係琅琊王氏。响司馬睿稱冒起之前，少年時就响洛陽同屬於琅琊王氏嘅王導打交道。琅琊王氏係當時東海地區一個好強大嘅地方勢力，後嚟司馬睿更被封為琅琊王，因此司馬睿同琅琊王氏關係相當緊密。後嚟經歷八王之亂同永嘉之亂後，司馬睿偕王導渡江至建康，响王氏支持下建立咗東晉政權。事實上，相對其他司馬氏皇室，司馬睿並唔係特別顯赫，聲名唔多夠嘅情況下，佢要依靠琅琊王氏呢個大宗族支持政權，亦因為咁佢重用王導，王導仲幫佢拉攏南方士族以及從北方逃至南方嘅落難士族，令東晉初期得到一個穩定嘅環境。由於王氏當時响朝廷權力甚大，連皇帝都要靠佢哋，因此就有「王與馬，共天下」呢個講法喇！

不過，作為皇帝嘅司馬睿又點會同王氏共富貴，响佢企穩陣腳後就壓制王氏權勢，最終逼使王氏造反，呢個就係王敦之亂。但好奇怪，王導並無跟隨弟弟王敦造反，响司馬睿死後為晉明帝司馬紹輔政，晉明帝死後又為晉成帝司馬衍輔政。提掣三代嘅王導位極人臣，但都算係為司馬氏盡忠。

原圖嚟自網絡