尋日睇新聞，見到菲律賓進行總統大選，今朝睇返結果就係小馬可斯贏得總統寶座。馬可斯家族响菲律賓政壇捲土重來，相信好多人都唔係太意料得到。
小馬可斯個爸爸就係菲律賓第六任總統費迪南‧馬可斯，佢可以話係二戰後菲律賓政壇嘅傳奇人物。馬可斯出身於當地豪門，响二戰後馬可斯先出任總統秘書、參議員、參議院議長，仲响1965年當選總統。當時佢除咗靚仔外，佢娶咗著名美女艾美黛亦成為一時佳話。其實响佢做菲律賓總統初期，菲律賓國勢响亞太地區嚟講係非常強，首都馬尼拉响六七十年代更加係亞洲金融中心。不過，隨住貪污腐敗問題嚴重，國家經濟狀況轉差，國內外開始出現反馬可斯嘅勢力，馬可斯就以強硬手段打擊政敵同反對勢大，最終佢响1986年因選舉舞弊而被迫流亡到美國夏威夷州。
不過奇怪嘅係，經過多年之後，菲律賓人對馬可斯評價亦有所改變，面對多年嚟國內經濟不景、社會問題多不勝數又解決唔到，唔少人反而懷念馬可斯統治時期。而佢個仔小馬可斯就藉著家族嘅影響力，進入政壇，最終成為馬可斯家族第二位菲律賓總統。
原圖：Malacanang Museum and Library