古代中國事生如事死,所以喺人去世之後都會將唔少生前用過嘅物品、衣著、食品、金銀珠寶甚至馬車都一同陪葬,「衣」、「食」、「行」都喺墓葬當中得到體現,咁「住」又會係點樣呢?今次阿史就同大家介紹一下「黃腸題湊」。

「黃腸題湊」並唔係普通人可以用到嘅一種墓葬形制,喺春秋時期去到漢朝,呢種墓葬就只有皇帝及其妻妾,以及部分得到朝廷特賜嘅官員、諸侯國國王先至可以用到。「黃腸題湊」當中所謂嘅「黃腸」係指黃心嘅柏木、「題」就係指木材接近根部嘅一段、「湊」就係指整體嘅形態向內壘起。成個「黃腸題湊」墓葬唔單止係以木材組成,仲會配合玉衣、梓宮、便房、外藏槨等構成一個帝王規格陵墓。

之不過,由於去到後來黃腸石逐漸取代黃腸木,「黃腸題湊」就開始絕跡,而講到呢種墓葬嘅代表作,西漢廣陵王劉胥墓葬就係當中數一數二,下回再同大家分解!

原圖嚟自網絡