之前提到三國時代受「二名為賤」風氣影響，所以東漢末同三國時代大部分武將個都係單字。如果玩過三國系列遊戲嘅史友，都應該會記得西南嘅孟獲就有一班個名奇奇怪怪嘅手下。

孟獲呢班手下就真係不得了！响《三國演義》裡面，孟獲手下就有木鹿大王、朵思大王金環三結、忙牙長、阿會楠、帶來洞主、祝融夫人、兀突骨等，阿史打三國遊戲時就好鍾意用呢啲武將，勝在膽正命平。可能史友們見到呢啲名個個古古怪怪，就會有呢啲人應該都係南蠻外族，所以個名同中原啲人有所唔同。又可能諗會唔會係「賤民」關係，所以啲名好多都兩三個字。其實，上述呢啲孟獲手下都係《三國演義》裡面虛構出嚟，亦因為咁，呢班武將响《三國演義》裡面先會咁古靈精怪。

有趣嘅係，响三國正史上除咗孟獲，其實仲有一位蠻王，佢就係沙摩柯。沙摩柯係武陵郡五谿蠻嘅首領，响夷陵之戰中就相助蜀軍作戰，可惜响呢場戰役中，佢就同蜀將張南、馮習一齊被吳軍斬首。

原圖：《三國演義》劇照