陝西其實係邊度以西？

上次阿史介紹咗河北嘅「河」湖南嘅「湖」，今次就想講講同陝西有關嘅呢個地方。陝西係中國中西部一個省份，睇個名都知係「陝」嘅西邊地區，咁「陝」即係邊度呢？

「陝」呢個地方，其實係依家河南省三門峽市陝州區，古時個一帶稱為「陝原」。呢個地方早响周朝已經有記載，周公同召公以此劃分領地，分陝而治。北魏孝文帝時响呢個地方置陝州，之後隋、唐、五代、宋、元、明、清各代該呢個地方均屬陝州。而陝州以西地區就係陝西喇！今時今日陝州區，就只係河南省三門峽市一個區，相對因呢個地方而嚟嘅陝西省，地位同份量就真係差好遠。而呢個地方依家最出名，就係由眾多地坑院組成嘅村莊。

話時話，記得發哥同梅姐拍個套《公子多情》，發哥笑梅姐話中國邊有陝東呢個地方，其實响中國古代歷史，確實存在過「陝東」呢個地理概念。