上次阿史介紹咗明仁宗朱高熾以仁德見稱,被後世尊為仁德之君。有史友就留言話佢亦係一個唯食皇帝,因為食得太肥所以早死,咁佢係咪肥皇帝一名呢?
明仁宗肥皇帝呢個形象都可以話係深入民心,最近內地一套古裝劇《尚食》,裡面演明仁宗嘅都係一位肥佬演員。咁史實係咁呢?其實明仁宗肥呢個形象係有一定根據,據《明史‧后妃列傳》有載:「太子(注:即朱高熾)數為漢、趙二王所間,體肥碩不能騎射。成祖恚,至減太子宮膳,瀕易者屢矣,卒以后故得不廢。」可見仁宗仲係做太子個陣,因為體肥而唔能夠騎射,仲俾成祖減佢宮膳。另一段响《明史》搵到嘅相關資料,就係《明史‧諸王(三)列傳》:「成祖嘗命同仁宗謁孝陵。仁宗體肥重,且足疾,兩中使掖之行,恒失足。」即係話仁宗肥到隻腳出問題。照咁睇,明仁宗都真係幾有斤兩。
原圖嚟自網絡