話說公司近日附近爆咗鹹水管,搞到成幢大廈無廁所水幾日,都唔難想像個環境有咁得人驚,忽然覺得有海沖廁原來唔係必然嘅事。
可能史友們都知道,香港係世界上少數用海水沖廁嘅地區,咁香港幾時開始用海水沖廁?原來早响上世紀五十年代,當時政府已引入海水作沖廁之用。水務署先响1957年於人口密集嘅石硤尾同李鄭屋邨安裝海水沖廁系統作試驗,後嚟更擴展至長沙灣、黃大仙、觀塘及香港島東部。到咗上世紀六十年代末港島同九龍大部分地區已有海水沖廁系統。咁點解會用海水作沖廁用呢?原因係簡單,就係因為香港淡水資源不足。
到咗今時今日,香港海水沖廁覆蓋率已達八成半,每年節省2.7億立方米食水,相等於大約三成嘅食水資源。