三星堆古蜀國文明相信唔少史友都必定聽過,就咁喺三星堆陪葬坑出土嘅文物大家就已經可以得知,當時呢個處於商代晚期嘅古蜀國並唔係荒蠻閉塞,反而係有住大家想像唔到嘅文明以及技術。咁到底一個咁犀利嘅古蜀國當時又點解會消失呢?今次阿史就同大家講一講啦!
雖然喺三星堆嘅遺址以及文物當中並未搵到任何文字嘅存在,但一大批嘅文物都可以反映到當時古蜀文明係相當發達,文化以及工藝上都有巨大嘅成就,甚至仲同周邊文明有唔少互動。而喺三星堆遺址當中就有發現官室或者重要建築被毀,咁到底一個好地地存在嘅文明點解會消失呢?
學者就推測有可能當地嘅居民唔係突然消失,反而係發生咗主體轉移嘅事件。目前學者就推測瘟疫、資源枯竭或者遭遇強敵威脅呢啲都係可能嘅原因,而三星堆嘅衰落可能係同50公里外嘅金沙遺址有關,因為當地嘅遺址規模、文物堆放方式、器物種類都反映緊兩者之間係有文化脈絡繼承關係。而要知道更詳細嘅原因,真係需要有更多考古發現先得喇!
原圖嚟自網絡