今年係香港回歸祖國二十五周年,如果史友們係住喺新界區,應該出入都會發現區內多咗唔少精美華麗嘅花牌,咁到底點解新界居民會以花牌嚟賀回歸呢?今次阿史就同大家講一講啦!
其實每逢新界居民有啲咩喜慶事,例如以往嘅公布婚訊、新店開張、就職典禮,又或者一啲重要傳統節慶如天后誕、太平清醮等,佢哋都以花牌嘅形式展示。最初嘅花牌真係由鮮花製成,但由於鮮花嘅花期短、唔能夠抵禦戶外風雨,所以後來就轉用紙花以及其他新物料,製成又耐久又好睇嘅花牌。
至於點解花牌會係一種展示嘅形式呢?有人認為花牌其實係中式牌樓嘅延續,又有人認為係模仿緊宮廷吉祥裝飾,但無論係邊一種起源,都係為咗向社區表達濃烈嘅祝賀之意。而之所以大家可以喺新界見到咁多花牌賀回歸,原因相當簡單,就係喺傳統新界人心目中,回歸就係佢哋心目中一等一嘅喜慶事!
原圖嚟自網絡