繼續同史友們介紹世界各地嘅一啲新奇考古發現，野外有唔少石頭可能都有成千上萬年嘅歷史，但要分得出邊啲石頭具有歷史價值就真係唔係一容易嘅事！而近日喺日本，就有一位11歲嘅小朋友竟然搵到一塊成四億年前嘅石頭，今次阿史就帶大家睇一睇啦！
喺沖繩縣就有一位11歲嘅男童自小就好鍾意收集石頭，佢經常都思考一個問題就係呢啲石頭到底係點樣形成。而喺舊年，佢就同爸爸喺瀬名波地區散步果陣，無意之中發現到兩塊1.2公分、微微散發出黑色光澤嘅石頭。呢兩塊石頭隨即就引起佢注意，為咗可以查明當中嘅來歷，佢就同佢爸爸到沖繩石之文化博物館。
喺館長同埋專家們嘅研究之下，確實就發現呢兩塊石頭並唔簡單，係兩塊可以追溯到4億年前古生代泥盆紀嘅「菊石化石」。呢類化石較常喺非洲摩洛哥等地區發現，而喺日本算係比較罕見，以往就只係出現過中生代嘅。而呢次發現化石嘅地方原本係前美軍機場基地，後來就重建成住宅區，咁所以專家就推斷化石可能係由美軍士兵帶到日本。對於呢次發現，就連館長都相當佩服呢位小朋友嘅眼光，目前化石就喺沖繩石之文化博物館展出。
原圖嚟自網絡