今時今日,無論係港式嘅絲襪奶茶,定係台式嘅珍珠奶茶,都已經成為大家日常生活經常都會飲到嘅飲品。之不過,唔知史友們又知唔知道,鍾意飲奶茶嘅唔單止係現代人,就連乾隆皇帝都係其中一位。
雖然話就話係百幾年前嘅奶茶,但乾隆所飲嘅呢種奶茶其實係偏向北方民族嘅奶茶,係唔少宮中之人食早點時都會飲到嘅。乳製品其實一直都係北方民族嘅傳統食品,但經過「茶馬互市」後,奶茶亦都隨之而生,清朝皇室入關後亦都繼續飲。
喺清宮當中,奶茶嘅需求極大,雖然材料都係牛奶、茶葉同埋水,但其實當中都有唔少講究,例如「每清晨,男、婦皆取乳,先熬茶熟,去其滓,傾乳而沸之,人各啜二碗,暮亦如之」。茶葉每年都會用上幾千斤嘅頂級茶葉、水就會用到「北京玉泉山」泉水,而奶牛後宮人員都有定額,所以當時飲一杯奶茶都唔簡單。
今時今日嘅奶茶就係日常飲品,但喺清朝果陣就會係祭祀、謁陵、祝壽嘅重要飲品之一,乾隆皇帝更加係奶茶嘅狂熱者,乾隆就曾經寫過:「國家典禮,御殿則賜茶。乳作汁,所以使用使人肥澤也」。為此更加有專門熬製奶茶嘅器具,真係不得了!
原圖嚟自網絡