早排阿史就同史友們講過蔣介石喺經歷「西安事變」後,就算了張學良喺54年當中三次求佢放過自己,蔣介石都因為深知張學良會對自己造成威脅而唔肯放過佢,甚至仲叫蔣經國要提防。咁就有史友問,既然蔣介石都深信對方係「籠中虎」,咁點解唔直接殺咗張學良呢?當中就有幾個坊間流傳嘅原因,史友們不妨睇睇!
其一,蔣介石唔敢殺張學良源於張學良曾經做過幾件大事,無論係1928年東北易幟、1929年中東路事件以至中原大戰,張學良始終都同蔣介石同一陣線,憑住東北軍幫助令到蔣介石大權在握。其二,就係喺西安事變發生後,宋家姐妹多次向張學良求情,希望佢可以保證蔣介石安全返到南京,而蔣介石本人亦都親口答應唔會殺張學良,咁所以為免失信於人,佢亦都只能夠以軟禁方式對待張學良。其三,就係雖然張學良被軟禁,但當時東北軍嘅主力仍然存在,宋美齡、宋子文等人亦係張學良好友,就算蔣介石幾有殺心都好,都係唔敢殺!
對於以上嘅原因,唔知史友們又點睇呢?