最近阿史睇咗一篇講明代《粵大記》嘅文章，講關於《廣東沿海圖》中香港部分相關地方名，阿史見到有個地方叫大小官富，咁到底即係邊度呢？
相信史友們都知官富場係北宋政府時期現今香港九龍東部一帶所設嘅官方鹽場，响《廣東沿海圖》中就叫官富巡司，而响呢個地方一個小山之隔，就有一個地方叫大小官富，咁呢個地方又係邊度呢？較普遍嘅講法，就係話大小官富就係今天嘅觀塘，因為官富場嘅核心部分係响依家九龍城一帶，而觀塘一帶係官富場嘅邊緣一帶，因此有可能係規模細啲嘅附屬鹽場，所以就叫大小官富。另有講法就係呢個地方應該係今日油塘，因為响地圖上睇呢個地方係响鯉魚門以東一啲，加上唔少史籍係話觀塘一帶屬於官富場範圍，所以同官富場一個小山之隔嘅地方可能就係油塘。