如果史友們有行開中式嘅廟宇，無論係佛教、道教定係一啲民間信仰相關嘅廟宇，殿內都必定會供奉住神佛。之不過，史友們又有冇諗過，我國竟然有一座廟宇，入面係完全唔供奉神佛呢？今次阿史就同大家講一講啦！
阿史所講嘅呢座奇廟，其實就係位於福建省惠安縣嘅「解放軍廟」。喺呢座1996年建成嘅廟宇當中，既無僧亦無尼，有嘅只係27尊解放軍雕像以及佢哋當年乘坐過嘅木帆船模型。
雖然呢座「解放軍廟」只有12平方米，但整體嘅建築由山門、正殿、紀念碑以至紀念館都一應俱全，並且係以崇武石雕工藝建成，絕對係一座有意思嘅閩南風格嘅仿古建築群。
咁史友們可能會問，點解冇啦啦會喺呢個地方興建一座「解放軍廟」呢？原來喺1949年嘅時候，解放軍第十兵團28軍84師251團就喺崇武西沙灣集結準備參與解放金門戰役，但當時國民黨轟炸機突襲，本身身處掩體之內嘅軍人為咗拯救海灘上嘅平民不惜以血肉抵擋炸彈。結果，為咗救一個小朋友，就犧牲咗五個軍人。呢位姓曾嘅小朋友為咗報答呢份恩情，喺長大之後就連同鄉親一同籌款，興建一座全國獨一無二嘅「解放軍廟」，就係為咗紀念合共27位為救當地老百姓而犧牲嘅烈士！
原圖嚟自網絡