呢排阿史都同史友們講咗唔少張學良同蔣介石之間嘅往事，之所以張學良會係東北軍嘅統領，全因為一個人物，就係佢嘅父親、曾經手握幾十萬大軍嘅北洋軍奉系首領張作霖，咁今次阿史就同大家講一講佢嘅一啲往事。
人稱「張大帥」嘅張作霖曾經就係北洋政府陸海軍大元帥，但好可惜喺1928年6月4日因為皇姑屯事件而被炸死。但作為北洋政府嘅一位統帥，佢曾經做過一樣大家諗都冇諗過嘅事，就係向巳退位後嘅溥儀下跪！
時間發生喺1925年，當時張作霖就已經喺第二次直奉戰爭打敗曹錕、吳佩孚，成為「東北之王」。溥儀响離開紫禁城之後就到天津生活。當時張作霖就派奉系將領李景林去訪問問候，又向溥儀送上十萬蚊以解經濟上嘅困難，呢一點令溥儀相當感動。
亦都係因為誠意足夠，溥儀亦都決定力排滿清遺老反對，決定見一見呢位張作霖。喺夜色之下，兩人就喺曹家花園見面，當時已經權傾中國嘅張作霖竟然向溥儀下跪，並且叫上一聲「皇上好」，呢個舉動當時嚇咗溥儀一跳。
咁到底點解張作霖要咁做呢？有講法就話溥儀本身仍然係有「皇帝」呢個招牌，有佢喺身邊做好多事就「出師有名」，想對付任何軍閥都冇問題。亦有講法話張作霖發跡初期受過清政府恩惠，所以响道義上就優待溥儀呢位末代皇帝。至於孰真孰假就無人知喇！
原圖嚟自網絡