响新安八景當中，除咗自然風光，其實都有同建築物有關嘅美景。就好似今次介紹嘅赤灣勝概就係其中之一。
赤灣勝概其實就係依家深圳南山區赤灣港嘅天后宮，呢座天后宮建於明朝永樂年間，由於天后宮所在位置係响珠江口出洋航道嘅一個必經之處，所以無論中國官民定係外國商使都會嚟呢度拜拜祈求出海平安無事一帆風順。據文獻所載，以往船隻出海前嘅祭祀儀式都係响呢度舉行，更有隆重祭祀儀式「辭沙」，特別凡係出使外國者都要參與呢個儀式。到咗清代，赤灣天后宮更曾獲幾位皇帝賜御書金匾。亦因為呢個天后宮名聲咁響，所以幾百年嚟都係香火鼎盛，以往連香港信眾不時有成過百艘船敲鑼打鼓到呢度參拜。
不過，今時今日嘅赤灣天后宮就唔係《新安縣志》中所載原來嘅天后宮，因為响上世紀六十年代原來嘅天后宮就無咗，依家嘅赤灣天后宮就係九十年代重建而嚟。
原圖嚟自網絡