最近响社交平台見到部分傳媒朋友去咗舊油麻地警署參觀，原因就係呢個二級歷史建築將於八月向公眾開放（不過預約已响七月頭結束），而近日就率先開放俾傳媒朋友去參觀。點解會有開放日呢？因為今年係呢幢舊警署落成同啟用一百周年。
油麻地一帶响十九世紀已經係九龍半島其中一個最熱鬧嘅地方，因為唔少漁民响油麻地避風塘居住，岸上又有好多同漁業相關嘅店舖，可以話係一個平民聚居熱點。亦因為咁旺又人多聚居，因此就有警署座落於此維持治安。最初嘅油麻地警署始建於1873年初，座落於上海街同眾坊街交界。响1922年，警署遷往廣東道627號，亦即係依家嘅舊油麻地警署。到咗2016年，新油麻地警署落成啟用，舊油麻地警署就只保留報案中心服務。
相信史友們都知道，昔日油麻地旺角一帶都係龍蛇混雜之地，所以唔少响油麻地警署工作嘅警察都有好多工作上嘅難忘經歷。除咗要偵查各類案件外，有前警官話以往不時有家長响夜晚帶住啲仔女去警署，叫警員們鬧啲小朋友。點解呢？因為佢哋未做晒功課。
原圖：wenweipo