相信史友們對林則徐响虎門銷毁鴉片呢段歷史都相當熟悉，可以話係初中中國歷史科當中必讀必考嘅課題。不過大家可能讀得呢個名多，但就未必個個去過虎門，今次就想同史友們介紹一下。
今時今日虎門呢個地方，係東莞市下一個鎮，即係虎門鎮。响歷史上，虎門嘅名氣就一啲都唔細，最出名自然係同林則徐銷毀鴉片有關。咁呢個地方又點會叫虎門呢？其實就未必係因為有老虎出沒，而係同珠江口兩座山有關。呢兩座山分別係大虎山同小虎山，而兩山對出水域就叫虎頭門，後嚟就被稱為虎門，連同附近岸邊都以此為名。據《東莞縣誌》記載:「二山對列，束隘如門，軒然昂頭，隱若虎踞，潮汐出入，勢甚雄激，南控重溟，為省城門戶。」另據《廣州府圖經志》所載：「大虎虎，二山相次，若虎踞之狀，故名虎頭門。」所以，虎門之名其實係同大虎山同小虎山而得嚟。
原圖嚟自網絡