近排新版公民與社會發展科教科書嘅內容就引起社會廣泛討論，討論嘅點係在於教科書以及其後教育局發表嘅文章都表示，香港回歸前非「殖民地」，香港自古以來都係中國嘅領土！到底爭議嘅位喺邊度呢？阿史今次就同大家講講啦！
對於呢件事嘅爭議，教育局就發文解釋指，成場爭議嘅起因全因為英國政府喺19世紀鴉片戰爭後，先後三次強逼清政府簽訂《南京條約》（1842年）、《北京條約》（1860年）及《展拓香港界址專條》（1898年）三條不平等條約，令到香港被英國強行割佔、租借及實行「管治」長達150幾年。
教育局就表示，雖然英國真係「管治」長達150幾年，但咁並唔代表相關嘅行為係合法，而根據國際法，英國呢種以武力脅迫清政府簽訂不平等條約嘅行為，其實係唔合法，所以歷屆中國政府從來都冇正式承認過。教育局亦指出，喺上世紀70年代以來，聯合國幾次決議及公布都表明香港並非所謂「殖民地」，甚至仲喺1972年11月，第27屆聯合國大會以99票贊成將香港以及澳門從殖民地名單中剔除。咁所以，如果仍然用「殖民地」形容香港就真係唔合適，亦都希望未來香港可以準確認識自己國家歷史咁話！
原圖嚟自網絡