相信熟悉清代歷史嘅史友都知，日本响1895年通過《馬關條例》將台灣強佔咗，開展咗之後半個世紀嘅日佔時期。可能以往中史科無乜點提及，其實响日佔初期，台灣島上嘅老百姓有反抗日本政府，亦因為咁令日本軍隊屠殺台灣當地人。
1895年日本強佔咗台灣後，當地就出現好多武裝反抗力量，其中就以「抗日三猛」最為著名，佢哋分別係簡大獅、柯鐵虎同林少貓，而柯鐵虎活躍範圍就响中部雲林，佢組織咗一支「鐵國山」義軍。响1896年4月，日本軍政府宣布結束軍政，進入民政時期，但同時又派軍隊進入雲林剷除反抗武裝力量，但就遭到「鐵國山」義軍反擊，最終响1896年6月日軍响雲林進行大屠殺，據當時雲林支廳長松村雄之進憶述，日軍認為「雲林轄下無良民」，於是將村莊全部焚燬，去到山區見人就殺，見屋就燒，婦女幼兒都唔放過。日本事後統計呢次屠殺有三萬幾名無辜百姓被殺。
有關呢段屠殺歷史，連當時香港同外國嘅報紙都有報道，好似當時《華字日報》就報道：「日本人正採取殲滅所有台灣人的策略……台灣人的收穫破壞、家園燒毀，祖先墳墓挖掘、婦女遭凌辱，憤怒到極點……。」後人稱呢次屠殺稱為「雲林大屠殺」。
原圖嚟自網絡