早排阿史就同史友們解構咗秦始皇兵馬俑單眼皮之謎，咁就有史友想阿史介紹多啲關於兵馬俑嘅故事，咁就當然冇問題啦！雖然經歷過定陵事件後，我國基本上唔會再主動發掘任何皇陵，但喺技術層面上嚟講，現今科技又有冇可能安全地發掘到秦始皇陵呢？今次阿史就同大家探討下！
作為千古一帝嘅陵墓，其實秦始皇喺繼位秦皇冇耐就已經開始修建陵墓，前前後後用咗差唔多三十年時候先至完成工程。而據史書記載，秦始皇陵墓以銅鑄頂，頂上以明珠做日月，內部以水銀為河流湖海，為咗防止被盜亦都滿佈機關。雖然歷經二千幾年，當中唔少機關應該都已經失效，但咁係咪代表以現今技術就可以成功發掘到呢？
答案當然唔係啦！先講土層問題，據考證秦陵封土層相當於一座小山，如果想發掘去到地宮，就相當於要將一座山咁多嘅封土移走，當中嘅代價已經相當沈重。
其次，秦始皇陵嘅兵馬俑出土之時就已經係一個相當大嘅啟示，原來色彩斑斕嘅兵馬俑喺發掘出嚟之後唔夠五分鐘，表層所有顏色就已經剝落，更何況係地宮當中經歷咗二千幾年密封狀態，想要完整發掘當中文物近乎就係唔可能。而且，雖然唔少機關已經失效，但地宮相信係有獨特嘅設計一經發掘就可能會即時自毀，所以喺技術層面上至今都未能安全打開秦始皇陵！
原圖嚟自網絡