阿史早兩日就同史友們介紹咗兩場日據時期喺台灣發生嘅悲慘大屠殺事件,當中數以十萬計嘅台灣人民無辜慘死,結局相當殘忍。日軍嘅暴行並未因為咁而停止,反而仲推出咗一個「五年理蕃計劃」武力鎮壓原住民,其中一場重大嘅戰爭就係「太魯閣戰爭」!阿史今次就同大家講一講啦!
「太魯閣戰爭」係指日軍對太魯閣族喺1914年5月17日至8月28日所發動嘅戰爭,亦都係日據時期喺台灣發生過嘅一場最大戰役。阿史之前都介紹過,日軍為咗可以向原住民地區擴張,所以就制定咗一個以武力征討為核心嘅「五年理蕃計劃」,希望可以喺真正意義上「統一」到台灣。
咁點解要冇啦啦攻打「太魯閣族」呢?其實都係離唔開資源!為咗可以控制到太魯閣地區龐大嘅自然資源,所以日軍就不惜多次探勘、觀測、地圖描繪,動用大量軍、警、人伕、運送補給線等等,去展開一場為期三個月嘅戰役。
雖然太魯閣原住民嘅壯丁基本上都擅戰,數量達到3000人並且擁有各種武器以及山區嘅地形守護,但由於佢哋真係喺山區當中,對於外界發生嘅一切真係唔清楚,所以喺三個月密集嘅戰役中,太魯閣族人一直處於劣勢反抗,戰敗收場!
原圖嚟自網絡