繼續同史友們介紹世界各地嘅一啲珍貴文物嘅消息，喺全球嘅文物市場當中，錢幣可以話係最熱門嘅種類之一，但史友們又有冇諗過，可能自己今日用緊嘅一枚錢幣，去到幾百年之後就可以價值上千萬、甚至億元呢？
阿史所講嘅呢枚錢幣，其實就係創下中國錢幣拍賣史最高紀錄嘅清代晚期銀元「奉天省造癸卯一兩」。其實喺拍賣呢枚錢幣之前，其實前一日就有一枚實物只見三枚嘅民國十六年張作霖像伍拾圓金幣以人民幣3,450萬元成交，本來都以為呢枚錢幣拍出一個相當高嘅價錢，但點知呢枚被稱為「中國龍銀大珍之首」嘅「奉天省造癸卯一兩」竟然可以拍出半億嘅高價，足足打破所有紀錄！
咁點解呢枚錢幣會咁值錢呢？除咗因為佢喺公開拍賣場上已經幾十年冇再出現之外，仲係因為當時鑄造年份為1903年，清廷就因為「圓兩之爭」幣制未決，錢幣就只屬試鑄而未經發行，所以呢枚錢幣真係孤品中嘅孤品！
原圖嚟自網絡