最近柬埔寨詐騙案不斷發酵，連入境處都話全力救助港人脫險，估唔到到咗今時今日，仲有呢啲咁嘅事。因為呢啲事，响百幾二百年前就相當流行。
阿史講緊嘅，就係清中葉以後極為流行嘅「賣豬仔」，「賣豬仔」响今時今日嘅概念就係販賣人口，將啲人送去他方打苦工，不過以往嘅「賣豬仔」有啲係被迫，有啲就自願，當然自願個啲都應該係有被人呃或壓詐。好喇！咁點解會叫「賣豬仔」呢？原來係有段故。當時林則徐除咗打擊鴉片貿易，佢對「賣豬仔」呢種人口販賣都相當痛痕，甚至曾經上奏道光皇帝：「又查另有一二夷船慣搭窮民出洋謀生，不要船飯錢文，俟帶到各夷埠，有人雇用，則一年雇資俱聽該船主取去，滿一年後乃按月給予本人工資。當其在船之時，皆以木盆盛飯，呼此等搭船華民一同就食，其呼聲與內地呼豬相似，故人目此船為買豬崽。」豬崽即係豬仔，咁叫佢哋係因為船中環境極為惡劣，林則徐呢道 《查明外國船只騙帶華民出國情形摺》真係完美咁解釋咗乜嘢係「賣豬仔」。
原圖嚟自網絡