珠江口水域係海淡水交界，好多地方嘅蝦都又肥又好味，最近阿史見到一篇報道，就話廣州有一種蝦王，叫做小虎麻蝦。唔知史友們有無食過呢？
呢款小虎麻蝦，就唔係因為有乜嘢老虎嘅特徵，而係呢種麻蝦原產自南沙黃閣鎮小虎村，所以呢種蝦就以此為名。雖然小虎麻蝦個頭就唔係好大，但顏色就格外紅艷，咬起上嚟就爽脆可口，格外鮮甜。據講呢款蝦以前因為太受歡迎，根本供不應求，因而好少外銷。但近年唔少南沙養蝦戶就因條村搬遷而將小虎麻蝦响南沙其他地方飼養，所以响南沙食到小虎麻蝦機會就大咗好多。
原圖嚟自網絡