繼續同史友們探討一啲有趣嘅歷史命題，關於開創中國大一統王朝嘅秦朝，後世對於佢嘅滅亡好多時候都係歸因於秦朝嘅暴政，之不過又係咪真係因為暴政就令到強大嘅秦朝只有十五年壽命呢？今次阿史就同大家講一講啦！
秦始皇嬴政作為開國皇帝，喺佢在位期間就實行咗三公九卿、統一度量衡、廢除分封制等重大措施；對外佢就抗擊匈奴，修築長城、靈渠等等，雖然過程中都係勞民傷財、百姓生活苦不堪言，但又係咪因為咁單純嘅原因令到秦朝快速滅亡呢？
其實喺秦始皇死後，胡亥以及大臣趙高就嘗試密謀稱帝，佢哋先係偽造詔書昭告天下，繼而賜死扶蘇、蒙恬，令到秦國失到真正才德兼備嘅君王。為咗可以坐穩皇位，胡亥甚至殺盡自己嘅兄弟姐妹二十餘人，以至後來身邊再冇人幫忙。至於趙高一心只係為權謀私，結果秦二世在位期間就令到征役更加繁重，行政更加苛暴。
當趙高女婿閻樂強逼嬴胡亥自刎於望夷宮後，秦三世雖然已經即時滅咗趙高，但當時秦朝就已經冇力回天。由此睇嚟，秦朝嘅滅亡既係在於暴政，但更大原因係因為秦朝無法傳承畀正常嘅後代，子嗣先至係問題核心，唔知史友們又點睇？
原圖嚟自網絡