近日阿史身邊一個朋友都真係相當慘,因為儲咗好耐錢買個預售單位,點知發展商通知延期入伙兼無任何賠償,甚至仲可能影響咗個銀行貸款,真係夠晒慘情。
以前曾經有個講法話香港地「地產原是永恒」,買樓長遠而言就多數有賺無蝕。講到香港地產業發展,就唔能夠唔提已故愛國港商霍英東同蟾宮大廈。响1958年,位於銅鑼灣嘅蟾宮大廈落成,當時霍英東就以分層分單位出售同賣樓花,當時市民俾出首期,之後透過銀行按揭,就可以成為業主。呢種首創嘅賣樓方式改變咗香港地產界嘅發展,部分商人以呢個方式發大財,市民亦可以置業有個安樂蝸。
蟾宮大廈唔單止係香港第一個以賣樓花同分拆方式出售嘅大廈,原來當時仲係香港最高嘅建築物。樓高17層嘅蟾宮大廈,當年就取代當時中國銀行大廈成為全港最高嘅建築物,而且座落高處,唔少單位可以環視港島區,以今時今日高樓密佈而言嘅銅鑼灣,的確有啲令人難以想像。
原圖嚟自網絡