尋日係中國人民抗日戰爭勝利77周年嘅重大日子,喺呢個重要日子同時亦都係全港首間抗戰紀念館「香港沙頭角抗戰紀念館」揭幕嘅日子!到底呢間紀念館將會有咩內容展示呢?阿史今次就同大家介紹下啦!
位於沙頭角嘅抗戰紀念館其實並唔係一座普通嘅建築物,而係由羅家大屋改建而成!熟悉香港抗日歷史嘅史友們應該都知道,喺1941年日軍侵佔香港之時,港英政府喺抵抗十八日之後就投降,隨即抗日嘅工作就由廣東人民抗日游擊隊當中嘅一支武工隊發起,當時嘅隊員羅汝澄就係以沙頭角羅家大屋為落腳點,開闢根據地,所以呢個地方又被稱為「香港抗日第一家」。
咁到底呢座紀念館當中又有咩睇呢?成個展覽就分成兩個部分,其一就係通過圖文、文物等史料為大家介紹東江縱隊港九獨立大隊嘅動人抗日事跡,其二就係就介紹「香港抗日一家人」羅家嘅感人事跡。「香港沙頭角抗戰紀念館」嘅出現,亦都意味住香港首間抗戰紀念館正式揭幕,大家有時間不妨去睇一睇!
原圖嚟自網絡