繼續同史友們介紹一啲古代打仗嘅趣聞，喺仍然使用冷兵器嘅時代，弓箭絕對係當時令到戰場士兵心驚膽顫嘅一樣武器。以往阿史就同大家介紹過點解古代弓箭殺傷力會咁大，但其實除咗箭頭上嘅致命設計外，其實古代嘅弓箭手都係相當犀利！
要喺古代成為一個出色弓箭手其實並唔係一件容易嘅事，先由姿勢上嚟講就要做到「五平三靠」，即係兩腳、兩手、兩肘、兩肩、天庭等五平，耳聽絃、箭靠嘴、絃靠胸等三靠，絕對需要長時間練習先可以做到。而且，喺戰場之上，古代弓箭手仲需要短時間內連續射出兩至三枝箭，心理素質都有極大嘅要求。
而另一樣重要嘅就係講求力量！如果以清朝武舉人嘅標準嚟講，一個基本嘅弓箭手至少要有拉動到12力弓嘅實力，最強就係要拉動15力弓，如果換算返即係最少要拉動156磅先至算係有實力，呢個難度係相當於單手拎起70公斤重量嘅物品，真係相當唔簡單！
原圖嚟自網絡