喺1924年10月23日，當時「討逆軍」第三軍總司令馮玉祥發動「北京政變」推翻曹錕政府後，隨即做咗一件改變溥儀一生嘅決定，令到佢喺美夢當中驚醒，呢個決定就係修改清室優待條款，將居住喺故宮嘅溥儀一幫人驅逐出宮。咁到底點解佢要咁樣做呢？阿史今次就同史友們講一講啦！
如果史友們有睇過《末代皇帝》呢套電影，相信大家都會認得以上呢張劇照，亦都會記得有段劇情就係喺眾人隱瞞之下，溥儀其實係未知道自己已經係亡國之君，甚至仲有段時間仲認為自己仍係「皇帝」，直到佢嘅細佬講出真相。而歷史上，即係去到1912年2月12日末代皇帝溥儀頒布退位詔書，當時政府仍然主動為清朝皇室成員予以優待，允許暫時居住於故宮，每年提供400萬元開支費用，配備衛隊保護皇室成員、清朝祖廟等等，做法溫和。
咁點解馮玉祥要不惜違約都要強硬咁趕溥儀出宮呢？當中原因就存在唔少恩怨。雖然喺退位之後溥儀一直喺宮中住咗十幾年，而國民政府都有一直提供每年400萬元款項，但後來財政緊縮，款項無法足額兌現。為咗維繫「皇室生活」，溥儀等人其實曾經變賣故宮文物，唔少國寶級文物都差啲賣咗畀日本人。而且，經過「張勳復辟」事件後，溥儀同唔少清朝遺老遺少仍有圖謀不軌之心，所以馮玉祥認為必需將呢個不安定嘅因素驅逐出宮，唔知史友們又點睇呢？
原圖嚟自網絡