要知道喺晚清之時成個國土都遭逢巨變，就連以往高高在上嘅慈禧太后都因為1900年嘅八國聯軍入侵而被逼逃離北京，當時慈禧太后以及光緒一行人就美其名為「西狩」，但實情就往西安逃走。
雖然話就話係逃亡，但當時慈禧太后一行人都帶同過千人陪同，當中有唔少宮女、太監陪同，所以其實係得到幾好嘅照顧。之不過，由於逃走得太突然，慈禧太后一行人並冇帶到好多錢糧，好快就吃盡苦頭，虎落平陽嘅佢其實相當希望有人可以幫助佢。
喺呢個時候，收到慈禧太后求助信嘅喬家喺家庭會議過後，雖然好多家庭成員都反對，但喬家家主決定贈與慈禧太后10萬兩白銀，希望可以幫到太后度過難關。面對喬家家主咁大方嘅決定，慈禧太后就表示「如今哀家落難，眾人避之唯恐不及，只有卿肯幫助哀家」，並且答應將來會加倍奉還。
結果，慈禧真係成功返到北京，並且開始清算以往嘅恩仇。諗起喬家救命之恩，本來慈禧以為對方會挾恩求報，但結果喬家家主就只係希望老佛爺幫佢寫四個字，就係「福種瑯嬛」。聽到呢個請求，慈禧想當感動，唔單止寫咗呢四隻字，並且下令所有地方上交給中央款項、庚子賠款全部交給喬家票號處理，變相令到喬家成為最大嘅受益方。
原圖嚟自網絡