今年係九一八事變91周年，對於侵華日軍所作嘅暴行，作為後代嘅中國人係永遠都唔會忘記。提起當中最慘無人道嘅戰爭，想必各位都會諗起731部隊所進行嘅細菌戰，而當日軍即將戰敗之時，就將唔少相當證據銷毀，令到對731部隊纍纍罪行得以隱瞞。
之不過，呢支惡魔部隊嘅所作所為係無法隱藏，有在世嘅親歷者近年決定勇敢打破沉默，向世人講解到底當時731部隊做過啲乜。據央視新聞報道，有位92歲名為清水英男嘅前731部隊成員，親自向央視記者表明自己罪孽深重嘅過去。
喺1945年3月，當時年僅14歲嘅清水英男喺老師推薦下就以見習技術員身份加入731部隊，仲被派到哈爾濱731部隊總部正式工作。而喺佢工作第一日，就已經見到好多人體標本，佢回憶當時呢啲標本都係解剖俘虜做成，當中有幼兒、有婦女腹中胎兒，過程真係極之殘忍，而佢當時內心亦都感到無比痛苦。
唔單止咁，清水英男仲喺731部隊當中見過喺冇麻藥情況下進行活體解剖、剝人皮等行為。而喺1945年日本投降前夕，為掩蓋罪證731部隊喺離開中國前炸毀了實驗室、監獄，屠殺囚犯並集中焚燒屍體，令到一切都好似冇晒證據。
事隔咁多年，清水英男決定打破沉默並向中國人民道歉，亦都希望年輕一代可以認識歷史。
原圖嚟自網絡