尋日就同史友們講到即使乾隆知道和珅貪污行賄、結黨營私,但因為深知佢對朝廷嘅重要性,所以仍然都係唔捨得殺佢。類似嘅處境喺歷史上亦都發生過,但當時呢位皇帝嘅選擇就截然不同喇!
喺崇禎即位冇耐,佢就不動聲色咁徹底肅清以魏忠賢為首嘅閹黨集團,令世人讚美佢係一個明君。之不過,呢種歡聲並唔係維持到好耐。雖然魏忠賢確實係一代權奸、結黨營私,但喺佢主政期間遼東局勢因為佢力排眾議起用熊廷弼,推薦趙南星、孫承宗、罷免袁崇煥而令戰局平穩;國庫空虛佢就向士紳、商人等中上層徵稅,平民生活並冇受到太大影響。
而喺魏忠賢死後,東林黨重新上台,代表住商人嘅佢哋由於唔敢徵收賦稅、鹽稅、布匹稅等商稅,轉頭就增加農民稅賦,甚至以前欠稅仲要補交。喺遇上接年嘅天災後,農民就只能參加起義。而冇咗魏忠賢制約後,文官集團內部黨爭加劇,朝堂之上就只有空話連篇,崇禎勵精圖治都難以有咩成果。呢個時候,就正如太監曹化淳所言「忠賢若在,時事必不至此」。
原圖嚟自網絡