繼續同史友們探討一啲有趣嘅歷史事件，按照傳統中國人嘅傳統，人死後都係希望可以盡快入土為安，但點解清朝德高望重嘅孝莊皇后喺死後足足39年都遲遲唔落葬？到底佢係咪得罪咩人，定還是有啲特別嘅習俗需要遵守？阿史今次就同大家講一講啦！
作為清太宗皇太極嘅妃子、順治帝嘅生母、康熙嘅祖母，呢位清初第一位皇太后同時都係一位出色嘅女政治家，佢一生擁立、輔佐兩任皇帝，深得民心，咁到底點解死後咁多年都唔能夠入土為安呢？原來呢點同佢臨終前嘅願望有關！
喺孝莊皇后臨終前夕，康熙其實一直陪伴在側，但孝莊皇后當時就有一個重要嘅遺願，內容就係「太宗奉安久，不可為我輕動。況我心戀汝父子，當於孝陵近地安厝，我心始無憾」，大意就係希望康熙唔好為咗佢而打開清太宗墓穴，而且佢本身就心繫於康熙父子，所以只需將佢安葬喺順治帝孝陵附近就可以。
聽到呢個遺願，康熙自然就係遵從，所以喺將孝莊皇后遺體安放喺梓宮之後，就喺孝陵附近修建「暫安奉殿」。之不過，咁樣都未算係入土為安，直到康熙離世後，雍正帝先至下令喺暫安奉殿就地建陵「昭西陵」，所以時隔39年孝莊皇后先至入土為安。
原圖嚟自網絡