响中國歷史上,唔同地方都會有地方豪族,而呢啲大族响當地有齊政治同經濟影響力,對於官府管治地方亦起到積極作用。上海金融區陸家嘴呢個地方,就係同明代當地一個地方士族大有關連。
先講講陸家嘴呢個地方。資料話响明永樂年間,黃浦江水系形成,江水自南向北與吳淞江相匯後,折向東流,東岸形成一塊嘴狀嘅沖積沙灘,而呢個沖積地就係後嚟嘅陸家嘴地區。至於點解同陸家有關呢?呢個就同明代翰林院學士陸深有直接關係。陸深係明中葉時期嘅政治人物,亦係著名嘅書法家同文學家,任官期間就先後做過國子監祭酒、陝西右布政使四川左布政使、光祿寺卿等職位。而佢同族人所居之地,就係今時今日陸家嘴一帶。所以,後嚟呢個地方就以「陸家」命名,稱之為陸家嘴。
响1970年嗰陣,响上海浦東就發現咗陸氏家族嘅古墓,墓中棺材內嘅就係陸深嘅骸骨,而墓中嘅墓志銘就係出自佢學生、明嘉靖時內閣首輔夏言所撰寫。
原圖嚟自網絡