以往阿史都同史友們講過慈禧太后就算喺走難嘅時候生活都係相當講究，逝世之時更加有極多價值連城嘅寶物陪葬，一個咁厲害嘅人物，在世之時嘅生活又有幾奢侈呢？阿史今次就同大家講一講啦！
提起呢個清朝最有權勢嘅女人，世人都知道佢曾經喺國難當前之時動用建造北洋艦隊軍費興建頤和園，又用幾千萬兩白銀去為自己慶祝六十大壽，咁除咗呢啲龐大嘅支出之外，佢日常又會點樣奢侈法呢？
先講飲食方面，慈禧太后每餐至少都有100道料理，其中20道以上都係甜點，鍾意食西瓜嘅佢就只會食成個西瓜最中心嘅3cm部分，所以經常一食就係幾百個西瓜。為咗保持容顏不老，佢每日都會飲人奶，由26歲進宮到73歲去世從未中斷，真係相當恐怖。
一個咁有權勢嘅人物，就連沖涼方面都相當講究。慈禧太后除咗會分成2個包著銀皮嘅木澡桶沖涼之外，每次仲會準備100條用金黃色絲線以及龍形圖騰刺繡嘅毛巾抹身以及塗上精油，一日沖上兩至三次涼，真係一個天文數字。
計埋平時搜集嘅奇珍異寶以及出遊嘅費用，呢位人物最高峰一日就可以用到四萬兩白銀，難怪清朝嘅國庫都會頂唔順！
原圖嚟先網絡