唔知史友們有無留意到，巴西總統選舉由前總統盧拉勝出，唔少人都話中國同巴西兩國嘅關係將回復到十幾年前嘅黃金時期，而巴西嘅華僑及華裔人士亦會有更大嘅發展空間。
唔講唔知，原來巴西依家係有中國移民日，以對呢個响依家巴西地區植根二百幾年嘅族群致敬。中國人移民到南美嘅巴西有成二百幾年歷史，不過最初嚟嘅中國人就曾經有好慘嘅經歷。响十九世紀初，流亡巴西嘅葡萄牙國王為繞過英國反奴隸制政策，就將首批中國人帶到巴西，而呢批中國人响澳門出發，然後越洋到咗南美，响里約熱內盧植物園同聖克魯斯帝國農場試種植茶葉。佢地唔單止要做苦工，後嚟有啲中國人更被米格爾親王獵殺。
雖然係咁，但巴西响十九世紀需要大量勞動力，於是响十九世紀就有大量嚟自中國嘅苦力賣豬仔去咗巴西打工，後嚟有啲人响呢個地方落地生根，就成為巴西國內一個族群。
原圖嚟自網絡