尋日就同史友們講到香港嘅西貢火山岩園區早白堊世流紋質火山岩柱群入選全球首批地質遺產名錄，而其實喺名錄當中一共有七個中國嘅地質遺產入選，珠峰奧陶紀岩石亦都係其中一個。
海拔8848.86米嘅珠穆朗瑪峰係喜馬拉雅山脈主峰，位於我國同埋尼泊爾邊界上，號稱係世界嘅屋脊。所謂嘅「珠峰奧陶紀岩石」就係珠峰最上嘅一個階地，要知道珠穆朗瑪峰山頂原本就係處於一片溫暖嘅海洋當中。
但隨住5500萬年前印度板塊向亞洲大陸漂移並與之碰撞，就令到青藏高原劇烈抬升，原本處於海洋當中嘅珠峰不斷上升成為山峰。如今珠穆朗瑪峰山頂由約4.6億年前奧陶紀中期石灰岩構成，當中就有豐富嘅海洋動物化石可以從中發掘到，唔少仲係已經因為奧陶紀生物大輻射時期而滅絕嘅熱帶海洋生物。
原圖嚟自網絡