之前阿史介紹十九世紀華工被「賣豬仔」到外邊打工個陣,都提及過澳門以前有好多「豬仔館」。今次阿史就想介紹多少少。
响鴉片戰爭以前,澳門因為被葡萄牙管治而响一段長時間係中國同外國貿易嘅重要港口,但後嚟英國通過不平等條約強行管治香港後,澳門呢個貿易樞紐地位就急劇下滑。而响呢個時刻,「一無正經生意」就開始响澳門活躍起嚟,除咗非法賭博場所,最離譜嘅就係販賣人口嘅豬仔館。而呢啲豬仔館唔少係由外國人開設、再聘請廣東省嘅華人做爪牙,以威迫利誘方式將「豬仔」運去外地。高峰時期,澳門豬仔館有成300幾間。當時歐洲各國輿論甚至將澳門販賣人口嘅豬仔行業同販賣非洲黑奴等同。
今時今日,响大三巴附近有一個雅景花園嘅住宅樓宇,前身係俗稱「長樓」嘅建築物,亦即係圖中嘅一排樓。响於十九世紀嗰陣,長樓曾經係「豬仔館」。
原圖嚟自網絡