「秋風起,蟹腳癢,九月圓~十月尖。」見到呢幾句話就知道阿史想講秋季美食大閘蟹啦!最近阿史行啲超級市場都見到有大閘蟹賣,甚至見過係香港養殖嘅大閘蟹,真係估佢唔到。
秋天食大閘蟹依家响香港可以話係一個潮流,咁香港人又係幾時開始有食大閘蟹習慣呢?就係二戰後喇!响上世紀四五十年代,好多內地人移居到香港,當中就包括咗上海、江蘇、浙江一帶嘅人,亦因為咁佢哋就將江南飲食文化引入咗嚟香港,大閘蟹亦開始响香港成為美食。而且,當時要將大閘蟹輸入香港,食肆就要搵人到內地採購再坐火車運返嚟香港,路途遙遠自然死唔少蟹,嚟得香港嘅大閘蟹自然成為貴價貨。睇返資料原來當時大閘蟹價格係比普通羔蟹貴成三倍,食得起大閘蟹真係有返多少銀兩先得。