今日係第二十三個中國記者節嘅大日子，喺我國為數唔多嘅行業節日當中，呢個節日嘅存在亦都係反映社會對「記者」呢個職業嘅認同以及肯定，咁史友們又知唔知到底「中國記者節」係點樣出現？原來當中都有唔少前人嘅犧牲，阿史今次就同大家講一講啦！
其實喺新中國成立之前，記者節一直都係冇具體嘅日期，只係由1933起每年新聞從業員都會舉行各種儀式作出紀念。直到2000年中國記協向國務院提出相關申請，先至喺11月8日正式確立呢個節日。咁在此之前，呢個節日又係點樣嚟呢？就係同國民黨殺害嘅記者有關喇！
喺上世紀30年代，國民黨為咗可以加強統治地方，於是就對唔少堅持正義嘅新聞工作者加以迫害、甚至殺害；圖中嘅呢位江蘇鎮江《江聲日報》主筆劉煜生1933年更加係因為「宣傳共產主義」而被江蘇省民政廳長趙啓殺害，隨即就引嚟輿論譁然，迫使到當時國民政府發出《切實保護新聞從業人員》通令。通令發出後，經過當時杭州記者公會，就決定將9月1日為記者節，呢個就係中國記者節前身。
而後來因為抗日戰爭爆發，新聞工作者統一戰線組織組成「中國青年新聞記者協會」，並且喺1937年11月8日成立上海嘅中國青年新聞記者協會，呢個協會即係中華全國新聞工作者協會嘅前身(簡稱中國記協)，所以往後就有咗呢個定係11月8日嘅節日喇！
原圖嚟自網絡