唔知史友們早兩日見到「超級血月兼月掩天王星」嘅千年奇觀，不過阿史抬頭見到嘅就係厚雲閉月，乜都睇唔到，只能响網上睇到相關奇景圖片。
月蝕响今時今日就被人視為天文現象，不過响古代中國對月蝕就有好唔同嘅見解。古代人視日蝕為「天狗蝕日」，而月蝕則被視為「蟾蜍食月」。呢個講法可見於司馬遷嘅《史記》，《史記·龜策列傳》有載：「月為刑而相佐，見食於蝦蟆。」一如日蝕一樣，古代人視月蝕為凶兆，所以當在月蝕出現時，啲人就會頂禮膜拜，祈求天神驅走蝕月嘅蟾蜍。
除咗蟾蜍食月呢個講法，其實古代民間仲有「天狗食月」之說。天狗响古代被視為兇獸妖獸，《史記·天官》載：「天狗狀如大奔星，有聲，其下止地類狗，所墮及炎火，望之如火光，炎炎沖天。」天狗食月自然被視為兇兆，所以响古代每逢月蝕之夜，老百姓就會燒爆杖，敲鐵鍋，製造巨大聲響以驅趕天狗。
原圖嚟自網絡