提起清朝地位最高嘅太監，相信唔少史友都會諗起李蓮英，而其實喺慈禧太后垂簾聽政之下，大太監李蓮英嘅野心亦都唔止係成為太監之首，佢仲想成為皇親國戚。之不過一個冇辦法有後代又冇辦法「父憑女貴」，咁佢又可以點樣做到呢件事呢？結果，李蓮英就諗到一個「絕世好橋」，就係將自己個妹李蓮蕪送咗入宮喇！
李蓮英成咗令自己嘅妹妹李蓮蕪成功入宮，一直以嚟都不斷向慈禧太后推薦，而後來李蓮蕪入到宮中，憑住自己嘅細心以及聰穎，確實係得到慈禧太后嘅歡心，唔單止被慈禧叫做「大姑娘」，成為宮中地位最高丫鬟嘅佢，甚至仲可以同慈禧同桌用膳，同場唔少妃子都只係企喺度望。
咁史友們可能會問，明明李蓮英係想自己成為皇親國戚，但點解自己個妹又只會做到丫鬟呢？其實李蓮英一直都慫恿慈禧將妹妹許配畀光緒，而慈禧太后都支持呢件事，但最終光緒就以「皇室不得娶漢女」為由拒絕咗呢件事，最終李蓮英嘅皇親國戚之夢就咁破碎喇！
原圖嚟自網絡