朱元璋嘅心狠手辣相信唔少史友都必定知道，就算曾經係開國功臣，只要佢認為有機會危害到朱家江山，佢都唔會放過。早年就隨朱元璋四處征戰嘅李善長，喺77歲之時就嘗試告老還鄉，但最終都係被朱元璋處死，到底當中發生過咩事呢？阿史今次就同大家講一講啦！
李善長喺幼年時就已經相當具有智慧同謀略，早年就經引薦投靠咗朱元璋起義，曾擔任掌書記、帥府都事、吳國左相國，詔書當中更將佢比肩蕭何。而喺明朝建立之後，佢更加位居開國功臣之首，任中書省左丞相，受封韓國公。李善長唔單止位高權重，而且仲曾經擁有兩塊免死鐵劵。
之不過，作為開國功臣、皇親國戚嘅李善長喺任內唔單止上奏朱元璋黜免李飲冰、楊希聖等人，更令到劉基告老還鄉，呢啲舉動早已令到朱元璋不滿。而後來李善長本來就已經因病辭官歸居，朱元璋仲畀咗豐厚嘅賞賜佢，其子李祺更被授為駙馬都尉，但點解後來又要殺佢呢？
原來胡惟庸案發生之時，李善長本身可以獨善其身，但後來因為長屢次向朱元璋請求赦免其親戚丁斌，繼而就被丁斌供出胡惟庸企圖謀反，仲曾經派過其弟李存義遊說李善長，而事件當中李善長更加同胡惟庸親自見過面。身為皇親國戚嘅佢雖然係拒絕參與造反，但知道有叛逆陰謀而唔揭發檢舉，最終就令到朱元璋將李善長賜死，其妻女弟侄等全家七十餘人一併處死，株連三族。
原圖嚟自網絡