繼續同史友們介紹我國最新嘅考古發現，近日湖北五龍宮遺址持續多年嘅考古工作就取得重大進展，阿史今次就同大家講一講啦！
其實早喺2020年9月，湖北省文物考古研究院就已經對位於十堰市武當山旅遊經濟特區五龍村進行考古發掘，據文獻記載，五龍宮就係武當山最早興建嘅道教宮觀，由唐太宗時嘅「五龍祠」，宋真宗時「五龍靈應觀」，元世祖時「五龍靈應宮」以至元仁宗時賜額「大五龍靈應萬壽宮」，直到元末先至毀於兵火。現存嘅五龍宮就係喺明成祖朱棣時興建，但就喺清代之後慢慢廢棄成為遺址。
據五龍宮遺址考古發掘項目負責人表示，今次湖北省文物考古研究院對五龍宮進行整體揭露式考古發掘，發掘面積近7000平方米，發現房址10座及水池兩處，唔單止出土遺物1000餘件，最重要係搵到三組浮雕——五龍浮雕、龜蛇浮雕、火紋及玉兔搗藥浮雕。呢次發現唔單止係湖北省內迄今為止發掘等級最高、遺蹟保存最豐富嘅道教宮觀遺址，更加係全國宗教考古與建築考古嘅一次重大發現。
原圖嚟自網絡