喺唔少古裝電視劇當中、甚至喺歷史上,每逢皇帝要進行封襌儀式,都必定會去泰山呢個地方舉行,咁到底封禪係啲咩?點解又一定要喺泰山舉行呢?阿史今次就同大家講一講啦!
所謂嘅「封禪」,「封」就係解做祭天,而「禪」就係解做祭地,而封禪之禮就即係一種表達皇帝受命於天下嘅古典祭祀。要知道古人視山為神靈,一啲較雄偉嘅山就會被稱為岳或鎮山,亦都因為呢啲山勢比較高,離天比較近,所以又會被認為係最接近神嘅地方。所以,「封禪」成個意思就係人間最高嘅帝王去到最高嘅山上去祭祀至高無上嘅神靈。
呢種習俗早喺春秋戰國就已經流傳,當時嘅儒士就認為泰山係天下最高嘅山,而泰山位於齊魯分界,所以齊國、魯國都會喺呢度祭祀泰山,「封禪」就係咁樣展開。喺歷史上,真正第一位舉行封禪大典嘅人就係秦始皇,而唐高宗、唐玄宗、宋真宗等人亦都舉行過封禪。
原圖嚟自網絡