提到清朝嘅名臣,相信唔少史友都會諗起張廷玉呢個歷史人物,要喺一位帝王之下打滾而又能平安無事都已經唔係容易嘅事,但張廷玉科舉考試「掹車邊」嘅情況之下,仲可以得到康、雍、乾重用,到底當中有咩原因?阿史今次就同大家講一講啦!
張廷玉出生於京師,係康熙朝大學士張英之子,喺康熙三十九年佢就以進士當中最後一等嘅成績高中。本來呢個成績未必會為佢帶嚟好好嘅前途,但就因為佢係康熙愛臣張英之子,所以就被授翰林院檢討,入值南書房。其後就一路由司經局洗馬、庶子、侍講學士、內閣學士再到刑部左侍郎,喺康熙朝中最終就被授吏部左侍郎一職。
喺一朝嘅君主之下可以風生水起已經唔容易,而喺後來雍正成為皇帝之時,由於雍正得知張廷玉名聲極佳、氣度端凝、應對明晰,於是一登基就對佢委以重任,提升禮部尚書,並且每逢內閣面奉諭旨,都會由張廷玉幫忙起擬草稿。張廷玉官位由禮部尚書一路升到保和殿大學士,仲負責處理埋《明史》總纂、「軍需房」緊急軍務,地位上嚟講已經係同怡親王並列。
去到乾隆年間,清高宗即位後亦都係命張廷玉總理事務、兼管翰林院事,期間多次得到乾隆賞識,相關事蹟亦被刻入國子監碑文當中,真係犀利!
原圖嚟自網絡